Jarlinn

2003-08-31T22:45:00.000Z

Grolsh í boltanum

Það var mikið grolch í boltanum á laugardaginn þegar við tókum á móti hressum Núnamönnum á Leiknisvellinum. Skemmst er að segja frá því að við lögðum þá að velli 3-1 en þetta var fyrri leikurinn í undanúrslitum. Fæst orð bera minnsta ábyrgð og svoleiðis verður það hjá mér um þennan leik! Þeir eru bjánar og vonandi rústum við þeim í síðari leiknum!! Þeir eru reyndar með ágætis lið en spila grófan og leiðinlegan bolta. Seinni leikurinn á þriðjudag á Tungubökkum í Mosfellsbæ kl 17:30, allir að mæta!!

2003-08-27T12:05:00.000Z

Sætara verður það ekki!!!!

Þessi fyrirsögn er hverju orði sannara því í gærkvöldi lögðum við Fjarðarbyggð í 8-liða úrslitunum í 3.deildinni! Fyrri leikurinn fór fram á laugardaginn á Eskifirði og fór ég ekki með sökum leikbanns. Einar „Buxi“ og Sævar voru einnig í banni. Eftir markalausan fyrri hálfleik settu þeir 3 mörk á okkur í síðari hálfleik og staðan frekar svört fyrir seinni leikinn sem fram fór í gær á Ghetto Ground að viðstöddu margmenni. Nokkrar breytingar voru gerðar á liðinu, ég kom inn í hafsentinn á ný, Sævar fór í vinstri bakvörðinn, Jón Steinar kom á miðjuna og Buxi kom í senterinn og leikkerfið var 4-3-3. Við vissum það að ef við myndum fá á okkur mark yrðum við að skora fimm svo menn yrðu að vera á tánum. Á 1. mín skoraði Haukur með skoti utan teigs og rétt fyrir hlé skoraði Sævar aftur og við því í ágætis stöðu í hálfleik og nú þurfti aðeins eitt mark til að knýja fram framlengingu. Strax í upphafi síðari hálfleiks skoraði Jón Steinar og 10 mín. fyrir leikslok skoraði Robbi sem hafði komið inná sem varamaður. Eftir þetta tókst okkur að halda fengnum hlut og fengu Fjarðarbyggðarmenn engin teljandi færi og 4-0 sigur staðreynd og sæti í undanúrslitum þar sem við mætum Núma. Fyrri leikurinn verður á laugardaginn á Leiknisvelli kl 14:00 og vil ég hvetja fólk til að mæta. Annars er það að frétta að skólinn er byrjaður og gengur hann sinn vanagang. Þess má geta að ég fékk gult spjald og var það hárréttur dómur! Þetta var ekki dómaraskandall eins og það er yfirleitt þegar ég fæ spjöld:)

2003-08-08T23:00:00.000Z

Sigur í hörkuleik

Í kvöld lögðum við Reynismenn að velli í úrslitaleik B-riðils á Leiknisvelli, 2-1. Eftir markalausan fyrri hálfleik og mikinn barning náðum við að setja 2 mörk um miðjan seinni hálfleik og vorum komnir í þægilega stöðu auk þess að vera manni fleiri síðustu 25.mín. En Reynismenn minnkuðu muninn með marki úr aukarspyrnu korteri fyrir leikslok en lengra komust þeir ekki. Þetta var minn fyrsti leikur á þessari leiktíð með Leikni og ég get ekki neitað því að mér leið vel að spila í kvöld. Fann mig fínt í leiknum í haffsentinum ásamt Snorra. Reynismenn fengu ekki marga sénsa í þessum leik þökk sé góðri varnarvinnu liðsins. Næsti leikur er á mánudag gegn ÍH á Tungubökkum. Annars er það að frétta að ég mun halda norður á morgun með Gissa en við ætlum í golf á Dalvík og sjá Leiftur/Dalvík-Stjörnuna kl 17 á morgun en aðalatriðið hjá mér er að sækja afganginn af dótinu mínu sem er á Ólafsfirði. Bið að heilsa í bili.

2003-08-07T23:25:00.000Z

Kominn á klakann

Nú er maður kominn á klakann eftir eftirminnilega 5 daga í góðra vina hópi. Fórum á fimmtudagskvöld, ég, Valur, Ása og Doddi. Ég er að hugsa um að skrifa eina ferðasögu en hún kemur ekki fyrr en eftir helgi ef af henni verður. Annars skemmtum við okkur konunglega og verð ég að þakka Freysa og Erlu fyrir sinn þátt í að gera þessa ferð ógleymanlega. Vorum í góðu yfirlæti hjá þeim og það var gott að sækja þau heim. Langt síðan maður sá þau skötuhjú síðast og kominn tími til!! Og ég verð að vera sammála Erlu í þeim efnum af hverju engin stúlkukind hefur nælt sér í mig:) Annars var gaman að lesa hvað hún skrifaði um okkur strákana eftir helgina á síðunni sinni. En ferðin í alla staði frábær og það er ekki hægt að lýsa henni betur en í einu orði: SNILLD

2003-07-31T00:43:00.000Z

Hæ hó og jibbý jei, það er komin 31.júlí!

Nú er komið að því sem allir hafa verið að bíða eftir!! Á morgun held ég til Kaupmannahafnar og ætla að vera þar ásamt 6 vinum í 5 daga yfir verslunarmannahelgina. Gissur er farinn, Sævar og Andi í fyrramálið og ég, Valur og Doddi förum kl 18:10 í dag, fimmtudag. Verðum í góðu yfirlæti hjá Freysa og þetta verður án efa stórkostleg helgi! Annars er það að frétta að ég er kominn suður endanlega í sumar og mun leika með Leikni það sem eftir er sumars. Ástæðan er sú að ég fer í skóla um miðjan ágúst og eftir að hafa verið í banni í 2 leiki og setið á bekknum næstu 2 þá ákvað ég að láta slag standa og leika með mínu liði það sem eftir lifir sumar. Reyndar hefur þetta sumar verið hið ánægjulegasta fyrir norðan. Búin að kynnast fullt af fólki, vinnan fín og strákarnir í liðinu fínir. En ég mun heimsækja Ólafsfjörð 2 svar í ágúst og oftar í náinni framtíð og á ég ánægjulegar minningar frá sumrinu. Mun leika minn fyrsta leik á þessari leiktíð með Leikni þann 8.ágúst gegn Reyni er það er einmitt úrslitaleikur riðilsins, ekki amalegt að byrja á því! Ég bið að heilsa í bili og læt heyra í mér heyra eftir helgina.

2003-07-11T18:58:00.000Z

Mikið fjör um helgina

Nú um helgina verður eflaust svakastuð þegar Jarlinn fær nú í fyrsta sinn heimsókn hér á Ólafsfjörðinn! Hingað koma Birgir Sverrisson, Ólafur Hvanndal og spússa hans María, Ásta Björk Agnarsdóttir og Þorbjörg Jónsdóttir. Þau munu renna í hlað þegar nálgast miðnætti og þá verð ég búin að taka til heima og redda dýnum:) Annars er það að frétta úr boltanum að ég hef átt í vandræðum með ökklann í þessari viku og fór til sjúkraþjálfara á miðvikudaginn. Við töpuðum síðan fyrir Þór 4-1 á Dalvík og fyrir Haukum 5-0 í síðustu 2 leikjum en ég er búin að taka út bannið núna í þessum leikjum. Tölurnar gefa þó ekki rétt mynd af þessu! Á móti Haukum voru tveir reknir út af á 50. mín og á móti Þór var einn rekinn út af eftir 50 mín!!! Nú er bara að bretta upp ermarnar og sleppa við þessi rauðu spjöld og koma tvíefldir til leiks gegn HK þann 19. júlí í Kópavogi!! Nú styttist í Dannmerkurferð okkar vinanna en sá fyrsti mun leggja land undir fót þann 30. júlí með Iceland Express, næstu tveir daginn eftir með Iceland Express og síðustu þrír með Flugleiðum sama dag:) Það verður glatt á hjalla hjá okkur vinunum hjá Freysa í þessa 5 daga og án efa verða drukknir 1-2 bjórar.

2003-07-01T17:02:00.000Z

Vesen!!

Það sem ég á við er það að það er eitthvað nýtt kjaftæði í bloggernum sem ég er ekki að fíla! Eitt annað sem ég er ekki að fíla og það er Hans Scheving! Lékum gegn Aftureldingu á föstudaginn á Ólafsfirði. Eftir að hafa verið 0-1 undir í hálfleik og getað ekki neitt rifum við okkur upp eftir öskrin í Nóa í háfleik og kláruðum dæmið í síðari hálfleik og unnum sætan sigur, 3-2 með marki frá Willa á lokasekúndunum en skömmu áður hafði mér verið vikið af velli með rautt spjald! Þannig er mál með vexti að ég fékk fyrra spjaldið á 2.mín eftir að ég hafði lent í 50/50 tæklingu við Albert Ara í Aftureldingu og Hansi kom askvaðandi að mér og sagði að ég hefði tæklað með báðum fótum og varð alveg öskureiður, ekki kannast ég við að hafa notað neina tvífótatæklingu! Seinna spjaldið var ekki hlægilegt heldur grátlegt! Á 92.mín vann ég boltann á þeirra vallarhelming þar sem einn Aftureldingarmaður braut á mér og missti ég við það jafnvægið! Lendi ég í því að renna mér í boltann en ekki vildi betur til að ég lenti í samstuði við varnarmann Aftureldingar. Hans fáviti Scheving notaði hagnaðarregluna en sá á einhvern óskiljanlegan hátt ástæðu fyrir að gefa mér spjald fyrir brot! Við fengum aukarspyrnu og skoruðum sigurmarkið! Ég fatt ekki eitt: Hvernig er hægt að refsa leikmanni fyrir slaka dómgæslu! Hann ákveður að nota hagnaðarregluna, hann verður að standa og falla með þeirri ákvörðun myndi ég halda! Ótrúlegt að vera að æfa eins og skepna í 10 mánuði og fá svo svona lélega dómara á þessu stutta tímabili! Annars eigum við útileik við Hauka á laugardag og verður sá leikur að vinnast! Við erum 1 stigi á eftir þeim. Ég er núna á leið í 2 leikja banna vegna 2 rauðra spjalda svo næsti leikur hjá mér er 19.júlí gegn HK í Kópavoginum. Annars er það að frétta að ég fór til Akureyrar á laugardagskvöldið ásamt liðinu út á lífið og var hörkustuð á Café Akureyri. Fórum fyrst til Sævars markmanns þar sem flestir komu saman og svo komu nokkrir leikmenn KA í heimsókn og með í för Danirnir tveir, Sören Byskov og Ronnie Hartvig. Spjallaði ég við þá á dönsku og komst að því að vinur Ronnie er að spila með Freysa úti hjá Jægersborg, gaman að því:)

2003-06-23T18:23:00.000Z

Heim í heiðarfjörðinn

Er nýtt máltæki sem ég hef fundið upp! Nú eftir rúma tvo tíma mun ég leggja flug undir fót og skella mér til Akureyrar með flugi. Búin að vera fín helgi og í dag fór ég svo í jarðarför hjá afa mínum heitnum. Í heildina fínasti dagur sem endaði svo hjá ömmu þar sem fjölskyldan hittist! Svo líður ekki langt þangað til að Doddi fer á Esso mótið á Akureyri og mun ég að sjálfsögðu mæta og styðja mína menn og sitja ásamt Dodda í stólunum okkar:) Óli Hvanndal ætlaði jafnvel að kíkja norður um næstu helgi og vonandi verður það að veruleika! Annars bið ég að heilsa fólki þangað til síðar. Flugið fer 21:15 og ætli maður skelli sér ekki á KR-ÍBV í kvennaboltanum rétt áður:)

2003-06-23T00:06:00.000Z

Hafði rétt fyrir mér

Ég hafði rétt fyrir mér í gær þegar ég sagði að það yrði eflaust stemmus maximus hjá Helga Pjetri! Það var glatt á hjalla í gær og var fjölmenni í Fljótaselinu og stemningin góð. Eftir smá drykkju hjá Helga og mikið spjalla við strákana fórum ég og Doddi niður eftir og hittum strákana. 15-20 manns úr Fellunum skunduðu um miðbæ Reykjavíkur og eftir gott rölt ákvað mannskapurinn að kíkja á Celtic Cross. Ég fór ásamt Kjarra og Dodda heim um 5 eftir að hafa hitt Willa, strák sem er með mér fyrir norðan. Hitt margt skemmtilegt fólk í bænum og í heildina var þetta mjög gott kvöld. Í dag tók ég mig til og vaknaði snemma og fór í golf með pabba og Árna bróðir. Eftir það fórum ég og Doddi niður í Rúmfatalagerinn og keyptum okkur tvo útilegustóla og eitt lítið borð og skelltum okkur á Hlíðarenda með nesti í hönd og horfðum á leik Vals og ÍA í mestu makindum. Fór vel um okkur í steinsteyptri stúkunni:) Eftir að hafa horft á leikinn og borðað nægju okkar lá leiðin í Árbæinn til að sjá leik Fylkis og KR. Gissi kíkti með þangað og að sjálfsögðu komu stólarnir að góðum notum í annars hálfbragðdaufum leik að mínu mati. Fyrri hálfleikur fínn en seinni drepleiðinlegur. Fer norður annað kvöld með flugi og minni fólk enn og aftur á að ef fólk á leið um Norðurland þá býðst því ókeypis gisting í 2 herbergja íbúð á Ólafsfirði svo framarlega sem þú þekkir mig:) Kveð í bili

2003-06-21T20:38:00.000Z

Stemmus Maximus

Jú, það verður eflaust stemmus maximus í kvöld þar sem ég hyggst leggja land undir fót og fara í Fljótaselið til Helga Pjeturs og heiðra hann með nærveru minni í tilefni tvítugsafmæli hans. Mun vera í Reykjavík fram á mánudagskvöld þar sem ég er að fara í jarðarför á mánudaginn. Það verður án ef fengið sér í aðra tánna í kvöld og svo er spurningin hvort maður fái sér jafnvel í báðar!! Nú verð ég að drífa mig í jakkafötin. Sjáumst síðar

2003-06-21T00:07:00.000Z

Tap í Keflavík

Núna í kvöld töpuðum við fyrir Keflvíkingum 1-0 í hörkuleik. Eins og mátt búast við fyrirfram voru þeir meira með boltann í leiknum en við áttum góðan fyrri hálfleik og náðum að skapa okkur tvö fín færi sem fóru forgörðum! Varnarleikurinn var í heild sinni góður en sóknarleikur liðsins var ekki nægilega beittur í síðari hálfleik en batnaði aðeins þegar Jói Trausta kom inn á. Markið þeirra kom á 60.mín eftir að okkur mistókst að hreinsa frá!! Annars er ég nokkuð sáttu við frammistöðu mína í leiknum, var að gæta Hólmars á kantinum og skilaði því ágætlega frá mér, ef hann komst framhjá þá sparkaði ég hann bara niður:) Núna liggur leiðin á Kofa Tómasar frænda þar sem ég ætla að slappa af ásamt Viðari, Jónu og Dabba Ramstein! Þangað til síðar, verið þið sæl! Leiknismenn gerðu jafntefli við Reyni, 1-1. Ótrúlega skrýtið að vera ekki að spila með mínum mönnum í Sandgerði og vera í næsta bæ að spila með Leiftri/Dalvík!

2003-06-20T02:34:00.000Z

Heim í heiðardalinn!

Ég vil byrja á því að afsaka hversu langt er síðan ég bloggaði síðast! Nú er ég kominn til Reykjavíkur en það bíður okkar norðanmanna leikur á morgun í erfiðari kantinum þegar við mætum Keflavík! Mun ég leika í stöðu vinstri bakvarðar sem mér líkar ágætlega þó svo að miðjan hefði verið betri kostur. Við erum búnir að spila einn leik frá því að ég bloggaði síðast, töpuðum þá ósanngjarnt fyrir Breiðablik, 2-3 en ég sat allan tímann á bekknum eftir að hafa tekið út eins leiks bann. Annars er allt fínt að frétta úr sveitinni, líkar mjög vel þarna og hef náð að skella mér nokkrum sinnum í golf núna í júní. Fór til Akureyrar á 17.júní og spilaði 18 holur um hádegið og svo aftur 9 holur seinna um kvöldið ásamt Daníeli Jakobssyni sem er maður dóttir vinafólks míns (náðuð þið þessu). Svo er vinnan hrein snilld, þar sem krakkarnir eru komnir til vinnu og er ég með 10.bekk eins og hann leggur sig ásamt öðrum strák í liðinu sem heitir Kolli. Fer norður aftur á mánudagskvöld svo þið sem viljið ná tali af mér, endilega hringið:) Þessu er beint til Sævars og Vals sem ég sá ekkert þegar ég var síðast í bænum! Það er nokkuð ljóst að það verður slappað af um helgina og farið í golf. Fer reyndar í tvítugsafmæli til Helga Pjeturs á laugardagskvöldið og á ég von á því að það verði fjör þar á bæ!

2003-06-07T00:35:00.000Z

Select, sko alls ekki lélegt!

Það er hverju orði sannara því hér stend ég og blogga á Select Vesturlandsvegi. Við hlið mér er Gissur Jónasson og Elvar Geir Magnússon. Leið mín liggur í sumarbústaðinn hjá Ása í Hvalfjörðinn. Í kvöld lögðum við Stjörnuna að velli, 2-1! Óvæntur en sætur sigur. Það er allt hægt er viljinn er fyrir hendi. Því er Einar Arnalds ekki sammála, þú stekkur ekki 4m í hástökki þrátt fyrir að viljinn sé fyrir hendi. Það er nokkuð til í því!! En sigurinn var sætur og verðskuldaður. Leiknismenn unnu svo sannfærandi sigur á Hamri, 6-0.

2003-06-05T16:59:00.000Z

Allt að verða crazy

Loksins, loksins er ég kominn á netið hér á Ólafsfirði! Nú er ég fluttur inn í íbúðina og og þetta hin huggulegasta íbúð eins og mamma myndi orða það. Búin að fá mér áskrift að Stöð 2, Sýn og Bíórásinni fyrir sumarið:) Netið kemur vonandi fljótlega. Búnir að spila 2 leiki, gegn Víkingi og Völsungi. Spilaði á miðjunni í báðum leikjunum og gekk upp og ofan. Spilaði fínan seinni hálfleik gegn Víking og svo ágætis 30 mín. gegn Völsungi þangað til að ég var rekinn útaf!!! Ég er hreinlega lagður í einelti af dómurum hérna fyrir norðan og einnig fyrir sunnan og meðan ég man, líka fyrir austan og vestan!! Sem sagt, lagður í einelti af dómurum um landið allt:) Annars töpuðum við fyrir Víking, 1-2 og Völsungi 5-0 eftir að hafa verið 2 færri í 50 mín. Annars er það að frétta að ég er byrjaður í vinnunni. Ég verð flokkstjóri hérna fyrir norðan en krakkarnir koma á mánudaginn. Annars var ég í hlutverki ruslakarlsins í dag og hirti upp ruslið með öðrum strák þjótandi um þennan RISAbæ! Kem suður á morgun, föstudag til þess að ná í bíl foreldra minna og horfa á leik Stjörnunnar og Leifturs/Dalvíkur. Reyndar væri ég til í að horfa á Hamar-Leiknir en ég held að ég verði að kíkja á okkur spila. Svo tek ég einn golfhring með Gissa á laugardagsmorguninn og svo held ég aftur norður yfir heiðar til þess að spila meira golf!!!

2003-05-26T14:24:00.000Z

Smá breyting

Ég ætla að láta fólk vita af smá breytingu varðandi íbúðina sem ég fæ. Hún er á jarðhæð í þessari sömu blokk. Samt sem áður er fólki guðvelkomið að koma:)

2003-05-25T23:15:00.000Z

Opið hús og ókeypis gisting

Fyrir áhugasama þá vil ég láta fólk vita af því að í sumar mun ég verða með opið hús fyrir þá sem leggja leið sína norður. Þeir sem hafa hug á að gista fá að sjálfsögðu gistingu en ég mun vera með eitt gestaherbergi fyrir gesti og gangandi. Svo verð ég með tour um bæinn og sýni fólki það allra áhugaverðasta, þ.e. golfvöllinn:) Annars eru þeir sem lesa þetta og þekkja mig, guðvelkomnir norður í sumar og vita að þeirra bíður gisting í boði Jarlsins! Íbúðin er á efstu hæð í 3 hæða blokk:) Já, það er blokk á Ólafsfirði!!!

2003-05-25T23:11:00.000Z

Þetta er að bresta á

Það má segja það að flutningur minn til Ólafsfjarðar sé að bresta á! Ég geri ráð fyrir að fara á morgun með flugi norður þrátt fyrir að íbúðin mín verði ekki tilbúin fyrr en 1.júní. Kem heim á föstudaginn til þess að ná í bílinn hjá mömmu og pabba sem þau ætla að lána mér á meðan þau spóka sig á Ítalíu í 2 vikur. Svo er maður alfarin eftir það! Skrýtin tilfinning en jafnframt spennandi. Ég vonast til þess að ég verði með nettenginu þegar ég verð kominn í íbúðina og mun þá blogga eftir mætti og lýsa lífinu í þessum 1000 manna bæ:) Ég bið að heilsa í bili, ætla að fara að athuga hvort golfsettið mitt sé ekki í góðu standi fyrir morgundaginn! Það liggur við að golfsettið sé mikilvægara en fótboltaskórnir:)

2003-05-24T20:00:00.000Z

Allt að gerast

Það var mikið að gera í gær, föstudag þegar ég skellti mér í 4 útskriftarveislur! Ég fór til Vals, Gissa, Óskars og stráks sem ég var með í Seljaskóla. Einnig heiðraði ég Þórunni með nærveru minni en hún var einnig að útskrifast. Þetta kvöld var hin fínasta skemmtun. Í dag vaknaði ég snemma og skellti mér niður á Flókagötu þar sem lið Leifturs/Dalvíkur gisti en þar beið mín morgunmatur. Svo tókum við léttan göngutúr niður í miðbæ og fórum svo á salatbarinn fyrir leikinn. Svo var farið í Njarðvík þar sem við öttum kappi við heimamenn. Lokatölur urðu 2-0 þeim í vil í leik sem við hefðum átt að vera búnir að gera út um og þá sérstaklega í fyrri hálfleik. Spiluðum ágætlega í 60 mín. og síðan ekki söguna meir!! Var ég færður í hægri bakvörð sem er nú ekki beint sterkasta staðan mín á vellinum en leysti hana í heildina ágætlega og þá sérstaklega fyrstu 60 mín. Ég var svo tekinn út af á 82. mín. Skítsæmileg frammistaða, ekkert meira en það! Planið í kvöld er einfalt, horfa á Eurovision og fer svo í útskriftarveislu til Róberts og Önnu.

2003-05-22T09:25:00.000Z

Ísveisla

Eflaust velta sumir því fyrir sér hvað þessi fyrirsögn þýði? Þannig er mál með vexti að ég, Kjarri og Gissi vorum að reyna að hringja á íslensku stöðina því þeir voru að gefa bragðarefi fyrir 4 gegn því að fólk myndi svara 3 spurningum. Eftir að hafa klikkað tvisvar hann Gissi náði ég loks í 3.tilraun að krækja í ísinn! En gamanið var ekki búið!! Þegar komið var að gefa ístertu fyrir 40 manns voru ég og Gissi rétt að skríða upp í Breiðholtið og ákváðum að hringja aldrei þessu vant. Gissi náði inn en klikkaði og þá héldum við að öll nótt væri úti en á einhvern ótrúlegan hátt náði Gissi aftur inn eftir að 4 einstaklingar höfðu klikkað á sömu spurningunni! Gissi náði inn og tryggði okkur ístertu fyrir 40 manns:) Annars er það að frétta að í gær skellti ég mér í sund og golf með Gissa, Kjarra og Dodda. Helvíti hressandi að gera eitthvað svona á daginn til tilbreytingar! Annars ætla ég að ná í bakkelsið í dag sem ég vann á íslensku stöðinni um daginn:) Ég fer með það á leikinn í kvöld, HK-Leiknir sem hefst kl 20:00 á Kópavogsvelli! Allir á völlinn.

2003-05-20T16:17:00.000Z

Ekki mikið grolsch í boltanum!

Þessa dagana er ekki mikið markvert að gerast! Þar sem ég var ekki búin að fá vinnuna og íbúðina fyrir norðan hef ég nánast ekkert að gera hérna fyrir sunnan á daginn fyrir utan það að fara að slá kúlur með Gissa. Annars verður maður að skella sér í sund á morgun, ekki spurning! Annars er viðburðarrík kvöld framundan þar sem verður mikið um fótbolta og ber þar hæst að nefna leik HK og Leiknis á Kópavogsvelli á fimmtudaginn kl 20:00! Ég hvet þá sem lesa þetta sem eru eflaust fáir að skella sér þangað alveg tjúllaða og öskra á Gulla Gull!!!

2003-05-19T11:04:00.000Z

Róleg helgi

Þegar á heildina er litið þá var þessi helgi með rólegasta móti. Fór á föstudaginn í tvö tvítugsafmæli og skemmti mér nokkuð vel. Á laugardagsmorguninn lá leiðin norður til Akureyrar með flugi þar sem ég var sóttur og hent á Ólafsfjörð þar sem beið mín æfing. Um kvöldið var tekinn nettur Ólafsfjarðarrúntur með innfæddum! Síðan var farið snemma að sofa eftir að hafa skoðað DV þar sem ég slefaði yfir myndinni af Ungfrú Norðurland, glímustelpunni Ingu Gerði Pétursdóttur. Á sunnudeginum vaknaði ég snemma og mætti kl 13:00 til þess að fara að keppa. Te og rist, göngutúr og fundur og síðast en ekki síst leikurinn sem hófst kl 16:00. Leikurinn fór 0-0 og stóð ég mig bara ágætlega í mínum fyrsta leik. Fékk reyndar spjald sem var bara hlægilegt! Mitt markmið í sumar er að fara ekki í bann! Ég ætla að standa við það! Fyrir ykkur sem lásuð þetta, þá var þetta ekki skemmtileg lesning en svona var þessi rólega helgi.

2003-05-14T21:30:00.000Z

Bráðin kemur blessað sumrið!

„Börnin fara að hlakka til. Allir fá þá eitthvað fallegt í það minnsta kerti og spil, kerti og spil, kerti og spil í það minnsta kerti og spil“. Svona syngur fólk á jólunum en ég syng svona núna því á morgun mun ég klára þessu helvítis próf og þá get ég loksins farið að hlakka til sumarsins sem verður með breyttu sniði í sumar ef svo má segja. Fer væntanlega um helgina norður en það er leikur á Ólafsfirði á sunnudaginn og ef allt gengur að óskum mun ég verða eftir ef ég verð búin að fá íbúðina. Öðruvísi en vonandi skemmtilegt sumar framundan.

2003-05-13T02:07:00.000Z

Spá mín

Þó svo að engin lesi þessa síðu þá ætla ég að gera líkt og Freysi og spá í íslenska boltann. Reyndar ætlar ég einnig að spá fyrir um 2.deild.

Landsbankadeildin

1. KR ( Þeir hafa það sterkan mannskap og einnig góðan þjálfara að ég held að þeir vinni þetta í ár en ekki með neinum yfirburðum þó.)
2. Grindavík ( Grindvíkingar hafa á að skipa einni sterkustu vörninni í deildinni ásamt því að vera með Óla Gott á milli stanganna. Þeir veita KR-ingum harða samkeppni)
3. ÍA ( Ekki sammála Freysa og spái þeim góðu gengi. Hafa á að skipa góðri blöndu af leikmönnum og hafa sterkan markvörð.)
4. Valur ( Að mínu mati frábært lið! Ég tek það fram, frábært LIÐ! Þeir spila sem ein heild og er hrein unun að fylgjast með þeim þegar þeir ná sé á strik. Með frábæran þjálfara og spila hraðan og skemmtilegan bolta.)
5. Fram ( Framararnir eru með mun meiri breidd í ár heldur en undanfarin ár. Verða stabílari í ár en í fyrra og með tilkomu Baldurs Bjarnasonar geta þeir gert fína hluti í sumar.)
6. Fylkir ( Margir hafa undrast þessa spá mína en hún stendur samt sem áður! Fyrirsjáanlegt lið og einhæfir með öllu. Byggja allt á hraða framherjanna sinna og það gengur ekki til lengdar. Ef Maggi Már er að spila eitthvað þá vona ég að þeim gangi betur en ef ekki þá vil ég helst sjá þá falla:)
7. Þróttur ( Þróttararnir eru líkt og Valur með skemmtilegt lið og á góðum degi geta þeir lagt hvaða lið sem er. Með reyndan þjálfara og fríska stráka og munu halda sér uppi.)
8. KA ( Mér líkar ekki vel við KA en samt spái ég því að þeir haldi sér uppi. Eru sterkir á góðum degi og held ég að Hreinn eigi eftir að hjálpa þeim fyrir framan markið. Náðu að redda sér út úr markmannsvandamálunum með Sören Byskov. Ívar Bjarklind einnig kominn aftur. Bjarga sér fyrir horn.
9. FH ( Að ráða Ólaf Jóhannesson er eins og að ráða Terry Venables, DAUÐADÓMUR! Þeir hafa verið skipulagslausir í vorleikjunum og með sama áframhaldi bíður þeirra ekkert nema fall í 1.deild. Óli verður rekinn í 13.umferð og Logi látinn taka við út tímabilið.)
10. ÍBV ( Heimavöllur þeirra ekki verið eins sterkur og undanfarin ár og ef Hlynur Stefáns spilar ekki með þeim þá geta þeir kvatt Landsbankadeildina. Birkir er algjör lykilmaður í þessu liði og mun skipta sköpum ásamt Hlyni ef hann spilar.)

1.deild

1. Keflavík ( Þeir fljúga upp um þessa deild með þennan þjálfara og þessa leikmenn, engin spurning! Vel spilandi og í þokkabót dregur Zoran vagninn þegar á þarf að halda.)
2. Þór ( Þórsararnir eru mjög sterkir á góðum degi. Eru með ágætis hóp en skortir tilfinnanlega breidd.)
3. Breiðablik ( Blikarnir hafa verið brokkgengir á undibúningstímabilinu en eru með góðan hóp og góða blöndu af yngri og eldri leikmönnum.)
4. Stjarnan ( Ég spái Gissa og félögum ágætis gengi eftir að hafa fengið Brynjar Sverrisson til liðs við sig en þeim vantaði framherja. Ef þeir sleppa við meiðsli þá verða þeir í efri hlutanum.)
5. Víkingur ( Hafa ágætis mannskap og fínan þjálfara en sárvantar markaskorara eftir að hafa misst Ragnar Hauksson og það mun há þeim.)
6. Njarðvík ( Hafa fínan mannskap, eru vel spilandi og þrátt fyrir að hafa misst 2 sterka leikmenn þá sigla þeir lygnan sjó í sumar.)
7. Afturelding ( Eru búnir að sanka að sér leikmönnum héðan og þaðan. Munu ekki fylgja eftir góðum árangri í fyrra og munu sogast í fallbaráttuna. Meðalmennskan ríkjandi.)
8. Leiftur/Dalvík ( Að sjálfsögðu ætlar maður að leggja sitt af mörkum til þess að hjálpa liðinu í sumar og ef baráttan, stemningin, viljinn, vinnslan og leikgleðin er fyrir hendi er engin spurning að við björgum okkur. Liðinu vantar tilfinnanlega 2 sterka leikmenn til viðbótar og einnig eru meiðsli hjá lykilmönnum. Mjög ungt lið og því fróðlegt að sjá hvernig því reiðir af.
9. Haukar ( Haukarnir munu í sumar öllum að óvörum lenda í fallbaráttu og á endanum falla. Þeir eru ágætir framávið en varnarleikur þeirra er stórt ?.)
10. HK ( Ég spái þeim ekki bara falli vegna þess að mér líkar illa við HK! Þeir eru einfaldlega ekki með gott lið! Vörnin hjá þeim er sein og slök í þokkabót. Miðjan er þeirra sterkasti hluti með Harald Hinriks, Zoran Panic og Ólaf V. Júlíusson. Sóknin er slök með Reyni Bjarna og einhvern Gunnar sem helstu markaskorara og það boðar nú ekki gott! Ef Gunnleifur nær sér vel á strik þá gætu þeir bjargað sér en ég ef það þó, því vörnin er of slök.

2.deild

1. Völsungur ( Fljúga upp miðað við spilamennsku þeirra í vorleikjunum. Hafa frábæran mannskap.)
2.-3. Fjölnir ( Eftir að hafa fengið gríðarsterkan Slóvena hafa möguleikar þeirra aukist. Vantar samt framherja eftir að Hallur Ásgeirs fór.)
2.-3. ÍR ( Þrátt fyrir að hafa misst einhverja leikmenn og þrátt fyirr erfiðleika í vorleikjunum þá verða þeir í baráttunni undir stjórn Kristjáns.)
4. KS ( Lið þeirra í vorleikjunum er allt annað en það sem kemur til leiks á sumrin! Án útlendingana geta þeir ekki neitt en með þá gætu þeir hæglega blandað sér í baráttna af fullum krafti.)
5. KFS ( Fínt lið með fínan mannskap. Ef Hlynur spilar með þá gætu þeir hæglega blandað sér í efri hlutann! Skiptir miklu að hann verði með svo og Yngvi Borgþórs og Sindri Grétars. Erfitt að fara til Eyja og hirða stig.)
6. Víðir ( Virka sprækir á undirbúningstímabilinu. Þeir munu byrja vel en svo fer að fjara undan þeim fljótlega. Sigla lygnan sjó.)
7. Selfoss ( Þeir munu aldrei ná fluginu og þrátt fyrir að hafa fengið Ómar Vald þá vantar ýmislegt í þetta lið. Væntingarnar of miklar miðað við mannskap. Lenda þó aldrei í fallbaráttunni.)
8. Sindri ( Með tilkomu Sævars Gunnarsson mun sóknarleikur þeirra batna til muna. En samt sem áður vantar eitthvað og þeir lenda í fallbaráttu.)
9. Tindastóll ( Eru að byggja upp á ungum strákum í bland við þá eldri. Þeir eldri eru hreinlega búnir á því og því verður erfitt fyrir þá yngri að draga vagninn.)
10. Léttir ( Það er kominn tími á þá! Nú er deildin mun sterkari og tími Léttismanna er liðinn því miður fyrir þá.)

2003-05-07T15:05:00.000Z

Ótrúlegt en satt!!

Nú er ég að blogga í fyrsta skipti í einhverja 5 mánuði! En þar sem ég verð fyrir norðan í sumar, nánar tiltekið á Ólafsfirði þá er ég að pæla í því að blogga í sumar til þess að lýsa fyrir Kjarra lífinu þar:) Þar að segja ef ég verð með netið! Annars bið ég að heilsa í BILI vonandi.

2003-01-05T19:22:00.000Z

Komin aftur

Ég get nú ekki sagt að maður hafi verið duglegur að blogga eftir áramótin og yfir höfuð:) En þetta kemur allt með kalda vatninu! Það er lítið að gerast þessa dagana og bíður maður í raun bara eftir að skólinn byrji. En þess má samt geta að á morgun er leikur hjá okkur í SÁ gegn Táfýlunni í Laugardalshöll kl 20:55. En þess má geta að aðgangur í þetta skipti er ókeypis þannig að þið þurfið ekki að koma með 100 kall:) En ef þið hafið áhuga að styrkja okkur þá er um að gera að koma með 100 kall!

2002-12-30T17:11:00.000Z

Alvarleg brot

Sumir hafa kannski lesið sögu vinar míns hans Sævars á heimasíðunni hans þar sem hann lýsir harkalegri meðferð lögreglunnar á sér síðastliðinn föstudag. Ótrúlegt að lesa þetta og sagði ég honum ásamt fleirum að sjálfsögðu kæra þetta! Ég býst við að Sævar muni leggja fram formlega kæru eftir áramót og verður spennandi að sjá framvindu mála;) Síðan fann ég þessa mynd þar sem lögreglumenn yfirbuga glæpamann og er þetta svipuð aðferð og hinn fyrirmyndarnáungi Sævar fékk hjá lögreglunni!

2002-12-26T20:02:00.000Z

Hin fínasta skemmtun

Þessir dagar, þ.e. aðfangadagur, jóladagur og dagurinn í dag hafa verið hin besta skemmtun. Ef ég á að vera eins og litlu krakkarnir þá fékk ég peysu og bók frá mömmu og pabba, frábæra húfu frá strákunum, peysu frá elstu bræðrum mínum, leik frá Árna bróðir og ilmvatn frá ömmu. Magnaðar gjafir og vil ég þakka þeim fyrir þessar gjafir! Síðan var slappað af á jóladeginum þar sem ég las bókina sem ég fékk, Röddina eftir Arnald Indriða. Og í dag er ég búin að vera að horfa á fótbolta enda af nógu að taka og spila við Árna og Nonna pípu.

2002-12-24T18:03:00.000Z

Gleðileg jól

Ég vil óska þeim fáu lesendum þessarar síðu gleðilegra jóla og farsældar á komandi ári. Nú er komin tími til að fara að borða þennan blessaða kalkún sem er á boðstólnum.

Jarlinn segir: Ég er varla kominn í jólaskapið en það kemur vonandi!

2002-12-23T00:41:00.000Z

Þvílík hörmung

Og ég er ekki að tala um leik Liverpool og Everton í dag heldur eitthvað miklu verra en það!! Jú, ég var að taka til í herberginu mínu frá kl 23:00 í gærkvöldi fram til 03:00 og þá fyrst veistu að líf þitt er hrein hörmung! Reyndar var ástæðan sú að ég er með smá flensu svo ég komst ekki í bæinn með strákunum. Fékk mér reyndar smá í glas á föstudeginum á Players og komst rétt niður í bæ áður en ég skreið heim aftur. En svo er bara að koma sér í jólaskapið og hafa það gott um jólin.

2002-12-21T03:56:00.000Z

Þvílík snilld!!!!!

Tónleikarnir hjá Coldplay voru hreinlega algjör snilld! Eins og áður sagði þá vantaði eitt lag til að fullkomna tónleikana og það var Warning shine! Annars toppaði þetta Sigurrós sem voru líka frábærir en þeir spiluðu fyrir mig á föstudaginn var og varð ég mjög glaður af spilamennsku þeirra! Ég fékk gæsahúð á þeim tónleikum en ég fékk gæsahúð nokkrum sinnum á tónleikunum með Coldplay!!

2002-12-20T23:04:00.000Z

Well the truth is, that i miss you, so

Ef þetta lag hefði heyrst í Höllinni hjá Coldplay þá hefðu þessir tónleikar verið fullkomnir!! En því miður verð ég að segja ykkur frá þessu betur á morgun því leið mín liggur á Players ásamt Viðari. Góða skemmtun Gunnar

Jarlinn segir: Nýji diskurinn með Coldplay er sá besti sem ég hef hlustað á síðan Automatic people kom út með REM!

2002-12-17T01:27:00.000Z

Faðir vor, þú sem ert á himni

Ég hef aldrei litið á mig sem guðrækinn mann og trúaðan en í kvöld baðst ég fyrir og fór með faðirvorið á meðan ég las Fréttablaðið. Þið hljótið að spyrja ykkur: Hver er ástæðan? Hún er einföld: Einkunnarafhending er á morgun og nú er bara að sjá hvort faðirvorið og bæn mín dugi eitthvað. Reyndar bað ég guð um að gefa mér svar ef ég ætti eftir að fá áfall þegar ég fæ einkunnirnar en hann svaraði engu svo ég er bjartsýnn!

2002-12-17T01:24:00.000Z

Þvílík upplifun

Það má með sanni segja að maður hafi upplifað margt skemmtilegt á sinni lífsleið en það sem ég upplifði ásamt fleirum á föstudagskvöldið er ólýsanlegt! Tónleikar í Háskólabíói með Sigurrós kemst á hátind upplifanna minna í lífinu svo góðir voru tónleikarnir! Og nú býður maður bara spenntur eftir að sjá RISA tónleikana í Höllinni á fimmtudag þegar Coldplay stígur á stokk í broddi fylkingar með hina stórgóðu hljómsveit ASH í eftirdragi.

2002-12-17T01:14:00.000Z

Undur og stórmerki

Hvað þá? Er ég að tala um það að ég sé byrjaður að blogga aftur? Nei, aldeilis ekki! Undrið og stórmerkið er það að ég „bjó“ til þessa blog síðu sjálfur og telst það til tíðinda sökum þess að ég hef yfirleitt bara kunnað að starta CM í tölvunni:) En nú er bara að sjá hve lengi maður heldur þetta út! Ég mun byrja að taka á móti veðmálum þann 19.desember, lægsta boð 500 kr.

Jarlinn segir: Practice er snilld og Sigurrós líka!